موقف في صيدليه لو كان اتحلفلي بالمصحف عليه مكنتش هصدقه!

موقف في صيدليه لو كان اتحلفلي بالمصحف عليه مكنتش هصدقه!

.
في البدايه كلنا على درايه بإرتفاع اسعار الدواء و تلاعب عدد كبير من الصيادله بالاسعار.
و من هنا تأتي الروايه..
.
كنت فصيدله باخد فيد باك.. و كان واقف راجل عجوز و معاه ابنه شاب فالثلاثينيات..
المهم الصيدلي كان عمال يجيب لهم الادويه اللي في الروشته دوا ورا دوا..
وفي الاخر الصيدلي قال للحج "انا اسف يا حج.. بس الروشته عامله 600ج.."
الابن طلع من جيبه 20ج وقال للصيدلي "اقسملك بالله ما معانا غير العشرين جنيه دي"
الصيدلي : "يعني لو اديتك علاج بيهم و خلاص حتى متعرفش تروح؟"
الابن : "والله العظيم يا دكتور احنا من ارياف بعيده و معندناش حتى صيدليه"
.
تخيلوا رد الصيدلي كان إيه؟؟؟
.
قاله بالنص كدا :
"خلاص يا حج.. خلي فلوسك معاك و خد كيسة الدوا اهي و لما ربنا يفرجها عليكوا افتكر ان عليك أمانه ب ٦٠٠ج هنا.. والف سلامه عليك يا والدي"
الحج تقريبا اتخرس و الابن والله كان هيعيط و عمال يقول للصيدلي " والله يا دكتور ما عارف اقولك ايه.. روح ياشيخ ربنا يكرمك و يعمر بيتك ...... " حوالي ربع ساعه بيدعوله و الصيدلي بيحاول يسكتهم و يطمنهم انه مش مستعجل ع الفلوس.
المهم خدوا بعض و الابن بيسند ابوه و طلعوا من الصيدليه و مهماش مصدقين.
.
ما يلفت في الروشته انها من مستشفى حكومي كبير
و مش مكتوب عليها اسم الطبيب المعالج كالعاده من المستشفى دي و كان فايد الطبيب انه يكتبله ادويا اخرى لكن واضح ان في شغل دعايه محترم معمول.
.
المهم انا وقفت للصيدلي شكرته و قولتله انت انسان محترم و عرفني انها مش صيدليته و هيحط ال٦٠٠ج من جيبه و قعدنا نسب و نلعن فحال البلد و نسيت الفيد باك و مشيت و انا الراجل دا نفسي اعمله تمثال.
المهم تاني اسبوع فنفس اليوم رجعت لنفس الصيدليه اسلم على الراجل المحترم دا واخد فيد باك ملقتهوش!
لقيت الدكتوره صاحبة الصيدليه موجوده و بسألها "امال فين د.محمد مجاش ولا ايه؟"
سكتت شويه و بصالي جامد و قالتلي "انت تعرفه؟"
قولتلها "بقالي فتره طويله بتاع شهر ولا حاجه من يوم مشتغل هنا وانا باخد منه فيد باك بس"
قالتلي "الدكتور محمد تعيش انت"
والله مالا يقل عن خمس دقايق وانا وهي باصين فعين بعض لا انا مصدق و حتى هي باين عليها انها مش مصدقه
قولتلها "محمد؟ محمد الطويل دا اللي لابس نظاره؟؟ بجد طب اذاي؟؟"
قالت " ايوه يا دكتور هو.. كان فاسكندريه من الاربع اللي فات و نزل الميه لوحده و اصحابه طلعوه بعد ما غرق"
من شدة الموقف كنت مندهش جدا اكني اعرفه من سنين مع اني متعاملتش معاه غير شهر بس دايما كنت بلاحظ فيه قد ايه هو خلوق و محترم
قالتلي "تعالى يبني اقعد " و سألتني تعرفه منين الخ..
فحكتلها ع موقف ال٦٠٠ج انه كان موقف شهم جدا واثر فيا.
فقالتلي ان محمد طالب فكلية الصيدله.. و هو طالع اسكندريه قالها ان في ٦٠٠ج ناقصين و كان استلفهم عشان محتاجهم و جابهم قبل ميسافر و مكنش حكالها ع الموقف قالها بس انه استلف ٦٠٠ج و جابهملها تاني يوم و بعدها سافر و مرجعش.
.
زي ما في ناس تمشي بيشنت عشان جنيه و ناس تشطب سعر و تحط سعر من دماغها ع علبة دوا.. لسه في رجاله عارفه تراعي ربنا في اضعف خلقه زيه.
.
#شكرا د.محمد و ربنا يرحمك يارب و نفسي اجي عندك اشوف الجنه بتاعة الناس ذوي الاخلاق دي عامله إزاي.
.
زي ما بنشارك الوجه السلبي شير للبوست دا جايز حد يعتبر
#منقول اعملوا للبوست كوبى بست نترحم على د محمد ونعتبر كلنا ان مش هناخد حاجة معانا غير اعمالنا الصالحة و #الدنيا_فانية
........................ منقول