المعلومة الحقيقية وراء الزنتاك و الرانى فورا

يوم 13/9/2019 (يعني من 4 ايام) ال fda اللي هي هيئة الغذاء والدواء الأمريكية نزلت منشور بيقول ان الأدوية اللي بتحتوي على مادة فعالة Ranitidine زي الدواء الشهير جدا (زانتاك) او في مصر فوار (راني) بتحتوي على شوائب في المادة الفعالة عبارة عن مادة "محتمل" ان تكون مسرطنة اسمها NDMA ( N-nitrosodimethylamine )

ومن ساعة الخبر ده والدنيا كلها مقلوبة كلام وتحذيرات وإشاعات وهلع وبوستات وحاجات غريبة كده

بداية قبل شرح اي شئ ال fda مطلعة الخبر ده من باب الشفافية ليس اكثر، لأن من حق المريض انه يعرف اي حاجة عن العلاج بتاعه سواء بالإيجاب أو بالسلب أو أي معلومة طبية عنه

طيب الموضوع ايه بالظبط؟
هعتمد في البوست على كلام ال fda نفسهم اللي الخبر طلع من عندهم واللي للأسف الناس اللي بتعمل الاشاعات بتنقل وبتحرف وبتقتطع كلامهم، وركز في كل كلمة لأن الكلام العلمي لازم يكون دقيق وكل حرف فيه له معنى

•• الموضوع ان مادة ال NDMA :
1. مادة "محتمل" ان تكون مسرطنة وركز اني بقولك محتمل وليس أكيد بنسبة 100%

2. المادة دي بتزيد احتمالية ان تكون مسببة للسرطان في الجرعات الكبيرة (كمان مرة في الجرعات الكبيرة)

4. المادة دي موجودة بكميات قليلة مسموح بيها في كتير جدا من الأطعمة اللي بنتناولها كل يوم زي اللحوم ومنتجات الألبان والخضراوات المتعددة 

5. المادة دي ليها حدود المفروض متزيدش عنها والموجود منها في الطعام كميات اقل من المسموح بيها فمش بتسبب خطر

6. الكمية الموجودة في الدواء اللي بنتكلم عنه (زانتاك او راني) اكتر بحاجة بسيطة من اللي موجود في الطعام ولكن أقل من الكمية المسموح بيها يعني مازالت في مستوى الأمان (وركز تاني انها مازالت في مستوى الأمان)

 المفروض المستهلك يعمل ايه (وده برضه كلام ال fda نفسهم) 

1. يأخذ العلاج بتاعه بأمان تام مفيش اي مشكلة او خوف او قلق

2. لو عنده اي قلق او خوف يستشير الطبيب او الصيدلي المختصين بالأمر يعني بلاش يستجيب لحالة الهلع والخزعبلات وهري السوشيال مديا وكلام الأستاذ محمد مدرس الرياضيات ومدام فتكات ادمن جروب انتي اقوى من ورق السلوفان، ونصيحة اخرى كمان ودي مني انا شخصيا حاول سؤالك يكون لطبيب أو صيدلي متين علميا وفاهم وبيحدث معلوماته باستمرار لأن للأسف (البعض) من الأطباء والصيادلة لم يقرأ أي شئ من أيام الكلية او بيكون مصدر معلوماته بوستات الفيس او اول نتيجة بحث بتطلع له على جوجل

وحاليا ال fda شغالة ابحاث علشان تشوف مصدر الشوائب دي ايه وجاية منين بالظبط ولو فيه اي خطورة او مشاكل صحية على المريض هيتم التنويه عنها في وقتها ولكن حتى الآن خذ علاجك بأمان بلاش تخوف نفسك وبلاش تخوف الناس وبلاش كل حاجة جنبها كلمة سرطان تقوم حاطط جنبها كلمة (تحذير) وتقوم عامل شير بدون ماتقرأ الخبر نفسه ومصدره فين وايه

 نصيحة مني انا 
• البوست ده مش معناه اني بشجعك تستخدم الأدوية عمال على بطال ولكن اي دواء في الدنيا ليه فوائد واعراض جانبية والطبيب او الصيدلي فقط هم اللي عندهم علم بالأدوية ويقدروا  يوجهوا المريض صح

• البوست ده مش معناه ان الزانتاك والراني ده حاجة جميلة ونشوف الناس بتشرب الراني بعد الأكل بدل عصير البرتقال او بيبلعوا بيه زي البيبسي وفاضل شوية ويقدموه لبعض مشاريب ويتحط بدل شربات الفرح.... الراني او الزانتاك له استخدامات محدودة زي حالات قرح المعدة او ارتجاع المرئ او حموضة المعدة الطارئة اللي بتجيلك مرة كده لو تقلت شوية في الأكل ولكن مفيش حاجة اسمها حرقان معدة مستمر وماشي على الراني وبيريحني ولا حرقان معدة مع كل وجبة ولا بيصحيني من النوم واقول كفاية عليه كيس الراني، الكلام ده خطير جدا ولو لقيت نفسك بتستخدم راني او زانتاك اكثر من يومين او ثلاثة متواصلين يبقى لازم تراجع طبيب متخصص جهاز هضمي فورا ولو معملتش كده فانت فعلا ممكن يكون عندك مشكلة كبيرة جدا وساكت عليها وفجأة هتدخلك في سكة انت في غنى عنها وهنا بقى بنقول انت فعلا عرضة للسرطانات بحق وحقيقي مش علشان الشوائب والكلام اللي في البوست فوق  ده ولكن علشان انت عندك مشكلة في الجهاز الهضمي (بغض النظر عن التفاصيل)سايبها تتفاقم ومش بتحلها

الراني والزانتاك ومثائلهم لو تم استخدامهم بالشكل المظبوط مش هيستخدموا ربع او حتى 20% من معدل استهلاكهم الحالي

شير للمعلومة الصحيحة وحاول توضح للناس الصح

مصدر الخبر 
https://www.fda.gov/news-events/press-announcements/statement-alerting-patients-and-health-care-professionals-ndma-found-samples-ranitidine

بالتوفيق للجميع

#اوصف_صح
#moamen_attya
#pharmaceutical_knowledge_academy